Em 15.8 het wie jedes Joh öseri Budebegtour stattgfode. Meh ode wenige guet usgschlofe hemme ös em Moge em 7i bim Chitzele troffe. Vo dei us sömme mit em Auto uf Wasseraue hönderi gfahre ond vo dei us mit em Bendli id Ebenalp uni gfahre ond hend zescht emol nebes chlises trunke.

Vo de Ebenalp us sömme den wite in Schöfle uni glaufe, dei hemme den auno nebes trunke, en feine Nossgipfel gesse ond di schö Ussicht gnosse. Vo dei us sömme den wite richtig Mesme glaufe.

Nochme feine Zmittag hemme ös gmüetlich ufde Weg i Seealp abi gmacht. Dei hemme denn no di letschte vo ös troffe ond hend ali mitenand en feine Dessert döre gnüüsse. Epaa hend denn d’Chance gnotzt ond hend sich im See d’Füess abkühlt. Vereinzelti hend denn schogää en Sprung is Wasse gmacht wo e riese schöni Efrischig gsee isch.

Wo denn alli wiede gröscht gsee sönd hets no sletscht Gruppefoti gee ond denn hemme ös au wiede ufde Weg i Wasserraue gmacht. Natülig hemme d‘Alperose nü wäle ossloh ond sönd au dei no wädli ees go trinke. Epaa hend denn no en Abstecher zode Andrea gmacht ond heend dei de Buudebegtag uusklinge looh.

En liebe Gruess

Tanja ond Leonie

Am Moge früeh uf de Ebenalp